နေပြည်တော်၊ တပ်ကုန်းမြို့ရှိ ဆင်သေရေလွှဲဆည်မှာ ငလျင်ဒဏ်ကြောင့် ကျိုးကျသွားပြီး ဆင်သေချာင်းကမ်းဘေး မြေနိမ့်ပိုင်းနေရာများသတိထားရန်လိုအပ် (ရုပ်/သံ)
နေပြည်တော်၊ တပ်ကုန်းမြို့ရှိ ဆင်သေရေလွှဲဆည်မှာ ငလျင်ဒဏ်ကြောင့် ကျိုးကျသွားပြီး ဆင်သေချာင်းကမ်းဘေး မြေနိမ့်ပိုင်းနေရာများသတိထားရန်လိုအပ်လျက်ရှိကြောင်း သိရှိရသည်။
ယနေ့ ညနေ ၅ နာရီ ၃၀ မိနစ်ကျော်အချိန်မှစတင်၍ ဆင်သေရေလွှဲဆည်မှာ ငလျင်ဒဏ်ကြောင့် မြေသားတာတမံကျိုးကျသွားခြင်းဖြစ်ကြောင်း၊ ယင်းနောက် ရေများမှာ ဆင်သေချောင်းထဲသို့ စီးဝင်နေကြောင်း၊ ထို့ကြောင့် ချောင်းဘေးဝဲယာမြေနိမ့်ပိုင်းဒေသတွင် နေထိုင်သော ပြည်သူများ သတိပြုရန် လိုအပ်ကြောင်း သိရှိရသည်။
အလားတူ မန္တလေးတိုင်း၊ မြစ်သားမြို့နယ်၊ စမှုံတံတားအနီး လမ်းပိုင်း ငလျင်ဒဏ်ကြောင့် လုံးဝ ပျက်စီးသွားပြီး လမ်း ပန်းဆက်သွယ်ရေး ပြတ်တောက်သွားကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ မတ်လ၂၈ ရက်နေ့ မွန်းလွဲပိုင်းတွင် စစ်ကိုင်းမြို့ အနီး ဗဟိုပြု၍ လှုပ်ခတ်သော မြေငလျင်ကြောင့် နွားထိုးကြီး-မြစ်သား လမ်းပေါ်ရှိ စမှုံကန်တံတားအနီး လမ်းပိုင်း လုံးဝ ပျက်စီးသွားပြီး လမ်းပန်း ဆက်သွယ်နေရေးများ ပြတ်တောက်သွားကြောင်း သိရသည်။
“လမ်းပိုင်းက ဆိုင်ကယ်တောင်သွားမရတော့ဘူး။ တော်တော်ပျက်စီးသွားတာ လမ်းပန်း ဆက်သွယ်ရေးတွေ ပြတ်တောက်သွားပြီ” ဟု ဒေသပြည်သူ တစ်ဦးက ပြောဆိုသည်။
